တရုတ်နိုင်ငံ၏ ဒုတိယအသုတ် အီဘိုလာရောဂါတိုက်ဖျက်ရေး ဆေးဘက်ဆိုင်ရာ ကျွမ်းကျင်ပညာရှင်အဖွဲ့ ကွန်ဂိုနိုင်ငံ (DRC) သို့ ရောက်ရှိ

ကွန်ဂိုနိုင်ငံ (DRC) ကျန်းမာရေးဝန်ကြီးဌာန ကိုယ်စားလှယ် Luku Maleyo Marius (အလယ်) က တရုတ်နိုင်ငံ၏ ဒုတိယအသုတ် အီဘိုလာရောဂါတိုက်ဖျက်ရေး ဆေးဘက်ဆိုင်ရာ ကျွမ်းကျင်ပညာရှင်အဖွဲ့အား ကွန်ဂိုနိုင်ငံ (DRC) မြို့တော် ကင်ရှာဆာ လေဆိပ်တွင် လာရောက်ကြိုဆိုနေသည်ကို ၂၀၂၆ ခုနှစ် ဇူလိုင် ၃ ရက်က တွေ့ရစဉ် (ဆင်ဟွာ)

ကင်ရှာဆာ၊ ဇူလိုင် ၄ ရက် (ဆင်ဟွာ)

တရုတ်နိုင်ငံ၏ ဒုတိယအသုတ် အီဘိုလာရောဂါတိုက်ဖျက်ရေး ဆေးဘက်ဆိုင်ရာ ကျွမ်းကျင်ပညာရှင်အဖွဲ့သည် ကွန်ဂိုနိုင်ငံ (DRC) မြို့တော် ကင်ရှာဆာသို့ ဇူလိုင် ၃ ရက်က ရောက်ရှိပြီး ပထမအသုတ် ပညာရှင်အဖွဲ့၏ လုပ်ငန်းများကို လွှဲပြောင်းလက်ခံကာ အီဘိုလာကပ်ရောဂါ ကာကွယ်ထိန်းချုပ်ရေး နိုင်ငံတကာ ပူးပေါင်းဆောင်ရွက်မှုကို လက်ဆင့်ကမ်းလုပ်ဆောင်လျက်ရှိသည်။

ကွန်ဂိုနိုင်ငံ (DRC) ကျန်းမာရေးဝန်ကြီးဌာန ကိုယ်စားလှယ် Luku Maleyo Marius က ကျွမ်းကျင်ပညာရှင်အဖွဲ့အား လေဆိပ်တွင် လာရောက်ကြိုဆိုခဲ့သည်။ Marius က ကွန်ဂို-တရုတ် ချစ်ကြည်ရေးသည် ရာစုနှစ်ဝက်ကျော်ကြာရှိပြီး နှစ်နိုင်ငံ ကျန်းမာရေးကဏ္ဍ ပူးပေါင်းဆောင်ရွက်မှုရလဒ်များမှာ အထူးထင်ရှားပေါ်လွင်ကြောင်း၊ အဆင့်မြင့်မားသည့် ကွန်ဂို-တရုတ် ကျန်းမာရေးကဏ္ဍ ပူးပေါင်းဆောင်ရွက်မှုသည် ကွန်ဂိုနိုင်ငံ (DRC) ဘက်က ပြည်သူ့ကျန်းမာရေးကဏ္ဍစွမ်းရည်မြှင့်တင်မှုကို လက်တွေ့အထောက်အကူပြုကြောင်း၊ လက်ရှိ ကွန်ဂိုနိုင်ငံ (DRC) ၏ အီဘိုလာရောဂါအခြေအနေမှာ ရှုပ်ထွေးနေဆဲဖြစ်ရာ ဒုတိယအသုတ် အီဘိုလာရောဂါတိုက်ဖျက်ရေး တရုတ်နိုင်ငံဆေးဘက်ဆိုင်ရာ ကျွမ်းကျင်ပညာရှင်အဖွဲ့သည် ဒေသကပ်ရောဂါ ကာကွယ်ထိန်းချုပ်ရေးအတွက် ဆက်လက်၍ အားကောင်းသောပံ့ပိုးမှုပေးရန် မျှော်လင့်ကြောင်း ပြောကြားခဲ့သည်။

ဒုတိယအသုတ်ကျွမ်းကျင်ပညာရှင်အဖွဲ့ခေါင်းဆောင် ကုကျစ်ချန်က ပညာရှင်အဖွဲ့အနေဖြင့် လုပ်ငန်းများကို အမြန်ဆုံး ဝင်ရောက်လုပ်ဆောင်သွားမည် ဖြစ်ကြောင်း၊ ကွန်ဂိုနိုင်ငံ (DRC) ကျန်းမာရေးဌာန၊ ကျွမ်းကျင်အဖွဲ့အစည်းများနှင့်အတူ နီးကပ်သော တွဲဖက်ပူးပေါင်းဆောင်ရွက်မှုများ ပြုလုပ်သွားမည်ဖြစ်ကြောင်း ပြောကြားခဲ့သည်။

ကူးစက်ရောဂါဗေဒဆိုင်ရာ စစ်ဆေးခြင်း၊ ဓာတ်ခွဲခန်းစမ်းသပ်စစ်ဆေးခြင်း၊ လူနာများအား ကုသပေးခြင်း၊ ကူးစက်မှုကာကွယ်ထိန်းချုပ်ခြင်းနှင့် ဝန်ထမ်းမွမ်းမံလေ့ကျင့်ပေးခြင်း စသည့်ကဏ္ဍများ၌ အဓိကထား၍ နည်းပညာဖလှယ်မှုနှင့်ပံ့ပိုးမှုများ ပြုလုပ်ကာ ကွန်ဂိုနိုင်ငံ (DRC) ၏ ကပ်ရောဂါကာကွယ်ထိန်းချုပ်ရေးနှင့် ကယ်ဆယ်ကုသရေးစွမ်းရည်ကို မြှင့်တင်ရန်အတွက် တရုတ်နိုင်ငံ၏စွမ်းအားဖြင့် အကျိုးဆောင်သွားမည် ဖြစ်ကြောင်း ၎င်းက ပြောကြားခဲ့သည်။

ကွန်ဂိုနိုင်ငံ (DRC) ၏ အီဘိုလာကပ်ရောဂါ ရင်ဆိုင်ဖြေရှင်းရေးတွင် တရုတ်နိုင်ငံ စသည့် ချစ်ကြည်ရင်းနှီးသောနိုင်ငံများနှင့် နိုင်ငံတကာအဖွဲ့အစည်းများက ပံ့ပိုးပေးသည့်အပေါ် ကျေးဇူးတင်ရှိကြောင်း၊ ကပ်ရောဂါသည် နယ်စည်းမခြားတည်ရှိရာ အတူတကွလှုပ်ရှားမှသာ နိုင်ငံအသီးသီးပြည်သူများကို ထိရောက်စွာ ကာကွယ်နိုင်မည် ဖြစ်ကြောင်း ကွန်ဂိုနိုင်ငံ (DRC) သမ္မတ Felix Tshisekedi က ဇူလိုင် ၂ ရက်တွင် ကင်ရှာဆာမြို့၌ ပြောကြားခဲ့သည်။

ယခုအကြိမ် ထွက်ခွာသွားသည့် တရုတ်နိုင်ငံ၏ ဒုတိယအသုတ် ကျွမ်းကျင်ပညာရှင်အဖွဲ့ အဖွဲ့ဝင်များတွင် ပြည်သူ့ကျန်းမာရေး၊ ဆေးကုသမှု၊ ရောဂါကူးစက်မှု ကာကွယ်ထိန်းချုပ်ရေး၊ ဓာတ်ခွဲခန်းစမ်းသပ်မှုနှင့် ကူးစက်ရောဂါဗေဒဆိုင်ရာ သီးခြားကွာရန်တင်းထားရှိခြင်း စသည့် ကျွမ်းကျင်မှုနယ်ပယ် အသီးသီး လွှမ်းခြုံပါဝင်ကြောင်း၊ အဖွဲ့ဝင်များသည် တရုတ်နိုင်ငံ အမျိုးသားကျန်းမာရေးကော်မရှင်၊ အထွေထွေအကောက်ခွန်အာဏာပိုင်အဖွဲ့၊ ဖုသန့်တက္ကသိုလ်၏ ဟွာဆန်းဆေးရုံ နှင့် တရုတ်နိုင်ငံ ရောဂါထိန်းချုပ်ရေးနှင့် ကာကွယ်ရေးစင်တာ စသည့် အဖွဲ့အစည်းများမှ ဖြစ်ကြပြီး ရောဂါကာကွယ်ထိန်းချုပ်ရေး အတွေ့အကြုံကြွယ်ဝသူများ ဖြစ်ကြကြောင်း သိရသည်။ (Xinhua)