အမေရိကန် တိုက်လေယာဉ် ဂျော်ဒန်တွင် အီရန်တိုက်ခိုက်ခံရ၍ ပျက်စီးခြင်းကို ထရမ့် ငြင်းဆို

အမေရိကန်နိုင်ငံ ဝါရှင်တန်မြို့ရှိ အိမ်ဖြူတော် တောင်ဘက်မြက်ခင်းပြင်တွင် မီဒီယာများ မေးမြန်းမှုအား ဖြေကြားနေသည့် အမေရိကန် သမ္မတ ထရမ့်အား ၂၀၂၆ ခုနှစ် ဧပြီ ၁၆ ရက်က တွေ့ရစဉ် (ဆင်ဟွာ)

ဝါရှင်တန်၊ စက်တင်ဘာ ၁၁ ရက် (ဆင်ဟွာ)

ဂျော်ဒန်နိုင်ငံ အခြေစိုက် အမေရိကန်စစ်တပ်စခန်းရှိ တိုက်လေယာဉ်သည် အီရန်၏ တိုက်ခိုက်မှုအတွင်း ပျက်စီးသွားသည်ဟူသော သတင်းဖော်ပြချက်ကို အမေရိကန် သမ္မတ ထရမ့်က စက်တင်ဘာ ၁၀ ရက်တွင် ငြင်းဆိုခဲ့သည်။

ထရမ့်က ထိုနေ့တွင် အမေရိကန် NewsNation ရုပ်သံလိုင်း၏ ဖုန်းဖြင့်အင်တာဗျူးကို ဖြေကြားရာ၌ အမေရိကန် တိုက်လေယာဉ်က အီရန်၏ နောက်ဆုံးတစ်ကြိမ် တိုက်ခိုက်မှုအတွင်း ထိခိုက်ပျက်စီးသွားသည် ဟူသော သတင်းဖော်ပြချက်မှာ “လုံးဝမမှန်ကန်” ကြောင်း၊ အမေရိကန်စစ်တပ်က “နစ်နာမှုမရှိဘူး၊ ဘာကိစ္စမှမဖြစ်ဘူး” ဟု ပြောကြားခဲ့သည်။

အမေရိကန် CBS သတင်းဌာနက စက်တင်ဘာ ၉ ရက်တွင် သတင်းအရင်းအမြစ်ပုဂ္ဂိုလ်၏ ပြောကြားချက်ကို ကိုးကား၍ အမေရိကန်တိုက်လေယာဉ် အစင်းများစွာသည် အီရန်၏ စက်တင်ဘာ ၈ ရက်တွင် ဂျော်ဒန်နိုင်ငံ Muwaffaq Salti လေတပ်စခန်းအား တိုက်ခိုက်မှုအတွင်း ပျက်စီးသွားကြောင်း၊ A-10 Thunderbolt II တိုက်လေယာဉ်တစ်စင်း ထိမှန်သွားကာ လေယာဉ်တောင်ပံတစ်ခြမ်း အက်ကွဲသွားကြောင်း၊ အခြား F-15 တိုက်လေယာဉ် ၈ စင်းသည် အနည်းငယ်ထိခိုက်ကာ လက်ရှိတွင် ပြန်လည်အသုံးပြုနေပြီဖြစ်ကြောင်း သတင်းဖော်ပြခဲ့သည်။

အီရန်မီဒီယာ၏ စက်တင်ဘာ ၉ ရက် သတင်းဖော်ပြချက်အရ အီရန် ရေနံတင်သင်္ဘောများ တိုက်ခိုက်ခံရမှုကို တုံ့ပြန်သည့်အနေဖြင့် အီရန်အစ္စလာမ်မစ် တော်လှန်ရေးအစောင့်တပ်ဖွဲ့သည် ဂျော်ဒန်နိုင်ငံရှိ အမေရိကန် စစ်တပ်စခန်းအား တိုက်ခိုက်ခဲ့ကြောင်း၊ ပစ်မှတ်များတွင် ရန်သူ တိုက်လေယာဉ် ဖြန့်ကြက်နေရာချထားသည့်ဇုန်နှင့် F-35 ၊ F-16 နှင့် F-15 တိုက်လေယာဉ်၏ အကာအကွယ်များ ပါဝင်ကာ ရန်သူတပ်ဖွဲ့အား “ပြင်းပြင်းထန်ထန် ပျက်စီးမှု” ဖြစ်စေခဲ့ကြောင်း သိရသည်။

ဂျော်ဒန်စစ်တပ်က ထို့နောက် ကြေညာချက်ထုတ်ပြန်၍ ဂျော်ဒန်နိုင်ငံ လေကြောင်းရန်ကာကွယ်ရေးစနစ်သည် အီရန်မှ ဂျော်ဒန်ဘက်သို့ ပစ်လွှတ်သော တိုက်ချင်းပစ် ပဲ့ထိန်းဒုံးကျည် ၁၈ စင်းအား အောင်မြင်စွာ ဖျက်ဆီးခဲ့ကြောင်း ပြောကြားခဲ့သည်။ (Xinhua)

---------------------

(Chinese Version)